Հարգելի Մհեր, բարև Ձեզ: Իհարկե Ձեր դեպքում մի փոքր դժվար է կողմնորոշվելը և վերջնական պատասխան տալը: Հետազոտությունների պատասխանները որոշ չափով տարբերվում են միմյանցից, դրանք կատարվել են տարբեր ժամանակ և հավանաբար օրվա տարբեր ժամերի, որի հետ կապված որոշ տարբերություններ կարող էին լինել: Սակայն բոլոր պատասխաններում էլ հստակ նշված է քարերի առկայությունը, լեղու թանձր լինելը, պատերի հաստացումը, պատասխաններից երկուսում նաև նշվում է լեղապարկի պատերի այտուց: Լեղապարկի ֆունկցիայի խանգարում ամեն դեպքում կա: Վերջին երկուսը նշանակում են, որ լեղապարկի խրոնիկ բորբոքում կա, որի հետևանքով լեղապարկի պատերը հաստացել են: Ինչ վերաբերում է անալիզների արդյունքներին, ապա հնարավոր է այս դեպքում դրանք այդքան էլ ինֆորմատիվ չլինենք: Ինչ վերաբերում է վիրահատությանը, ապա դա կարող է միայն որոշել վիրաբույժը, քանի որ ավելի հստակ պատկերացում ունի խնդրի մասին: Լեղապարկի նախքին կառուցվածքը դեղորայքային միջոցներով վերականգնել միանշանակ հնարավոր չէ, քանի որ կան արդեն օրգանական փոփոխություններ, ինչ վերաբերում է ֆունկցիային, ապա դեղորայքային միջոցներով որոշ չափով կարելի է բարելավել, սակայն լիարժեք վերականգնել չի ստացվի: Լեղապարկի քարերի դեպքում կա ևս մեկ վտանգ, հնարավոր է որ դրանք շարժվեն և խցանեն լեղածորանները և առաջացնեն դեղնուկ, քանի որ չափերով այնքան էլ մեծ չեն: Ինչևէ, նամակից պարզ է, որ Ձեզ խորհուրդ են տվել վիրահատություն, սակայն Դուք չեք ցանկանում: Իհարկե ընտրությունը Ձերն է, ուղղակի ներկայացվում է օբյեկտիվ իրավիճակը և հնարավոր բարդությունները, իսկ վերջնական որոշումը միշտ էլ հիվանդինն է:

Հարգելի Agapi, մեղր կարելի է, եթե այն չեք օգտագործում կարագի հետ:

Հարգելի Malsida, բնականաբար լեղապարկի հեռացումից հետո լյարդի ծանրաբեռնվածությունը մեծանում է, և համապատասխան դիետա պահելով Դուք ազատում եք լյարդը ծանրաբեռնվածությունից: Լեղապարկի հեռացումից հետո խորհուրդ չի տրվում ընդհանրապես օգտագործել ծանր, ճարպերով հագեցած, տապակած, կծու կամ թթու սնունդ: Ցանկալի է օգտագործել ավելի դյուրամարս սնունդ:

Հարգելի Marine, եթե քարը գտնվում է լեղապարկում և չունի կլինիկական դրսևորումներ,ապա այն բուժելու կարիք չկա:Կարելի է համապատասխան դիետա պահել բարդություններից խուսափելու համար: Եթե քարը գտնվում է լեղուղիներում, այն առաջացնում է մի շարք բարդություններ : Նշեմ, որ մինչև 2սմ չափի խոլեստերինային քարերը հնարավոր է լուծել դեղորայքային միջոցներով: Սակայն դեղորայքային բուժումը երկար կարող է տևել: Խոլեստերինային քարերի դեպքում ցուցված է նաև հարվածային ալիքի օգնությամբ քարի մանրացումը և դուրս բերումը օրգանիզմից: Այս մեթոդը ցուցված է մինչև 3-3.5 սմ մեծության քարերի դեպքում: 

Հարգելի Անահիտ, նախ պետք է հստակցենել  լեղաքարային հիվանդության կլինիկական նշանները: Գկխացավերը այնքան էլ բնորոշ չեն լեղաքարային հիվանդությանը, դրանց պատճառը այլ է: Իսկ ինչ վերաբերում է սրտխառնոցին, փսխմանը և ցավին, ապա դրանք ոչ միայն լեղաքարային հիվանդության, այլև լեղպարկի բորբոքման ախտանիշներ կարող են լինել, և  խնդիրը  լուծել սովորական ցավազրկողներով ցավոք հնարավոր չէ: Սրտխառնոցը և փսխումը կապված են լեղու արտահոսքի խանգարման հետ, իսկ ցավը վկայում է լեղապարկի բորբոքման և պատիճի գերձգման մասին: Տնային պայմաններում բուժում ստանալ միանշանակ ցանկալի չէ: Հարկավոր է դիմել գաստրոէնտերոլոգի և ստանալ համապատասխան բուժում: Մինչ այդ վիճակը թևթևացնելու համար կարող եք օգտագործել լեղամուղ թեյ,օրինակ անթառամի, իսկ  ցավերի ժամանակ  սպազմոլիտիկ միջոց, օրինակ նո-շպա կամ սպազմալգոն:

Հարգելի  Lilit Grigoryan, լեղաքարային հիվանդության ժամանակ ընդհանրապես ցանկալի չէ օգտագործել յուղոտ և դժվարամարս սնունդ: Փորձեք օգտագործել ավելի շատ դյուրամարս սնունդ, օրինակ՝ բանջարեղեն, կանաչեղեն և միրգ:

Հարգելի Shushanna, պարտադիր չէ, որ մարդն ընդհանուր անզգայացումով վիրահատությունից ու անզգայացումից դուրս գալուց հետո սրտխառնոց կամ փսխում ունենա: Դա խիստ անհատական է և պայմանավորված է օրգանիզմի առանձնահատկություններով: Մեկ ամիս անց եթե սրտխառնեցներ են ի հայտ եկել, դա ամենևին էլ ընդհանուր անզգայացման հետևանքները չեն: Հետևեք հիվանդի սննդակարգին և ամեն ինչ լավ կլինի: Եթե համառորեն չանցնի, դիմել մասնագետի խորհրդատվության:

Հարգելի MESROP, լեղին, ինչպես հայտնի է, արտադրվում է լյարդում և լեղային ծորաններով հավաքվում լեղապարկում: Հենց այստեղ է, որ նյութափոխանակության խանգարումների արդյունքում զարգանում է լեղաքարային հիվանդությունը: Լեղապարկը հեռացնելուց հետո խնդիրը լուծվում է: Շատ հազվադեպ  լեղային քարեր կարող են լյարդում կուտակվել:

Հարգելի ԱՐԱՔՍՅԱ, բարև Ձեզ, Ուրդոքսա դեղը հակացուցված է կերակրող մայրերին, առավել ևս, երբ այն ընդունվում է երկարատև: Հարկավոր է խորհրդակցել դեղը նշանակող բժշկի հետ և որոշում կայացնել. եթե հնարավոր է այն փոխարինել որևէ այլ դեղով, կամ, եթե հիվանդության ընթացքը թույլ է տալիս, սպասել մինչև երեխան դուրս գա կրքով կերակրվող ժամանակահատվածից:

Հարգելի Arpine, դժվարանում ենք միանշանակ պատասխան տալ, հատկապես, որ առողջությանը վերաբերող հարցերի դեպքում շատ կարևոր է բժշկի ընտրությունը և հավատըբնրա նկատմամբ: Այցելեք մեր կայքի ԲԺԻՇԿՆԵՐ էջը և փորձեք ընտրել ու գտնել Ձեր բժշկին:

Հարգելի Լուիզա, բարև Ձեզ, գոյություն ունեն ցավազրկողներ, որոնց օգտագործումը բերում է կախվածության, առանց որի ընդունման այլև օրգանիզմը չի կարող, այդ կախվածությունն են անվանում թմրամոլություն ( նարկոմանիա), որը շատ դժվար է բուժման ենթարկվում՝ ժամանակի ընթացքում աղճատելով ու դեգրատացնելով մարդուն:

Հարգելի shushan.gevorgyan, բարև Ձեզ, անմիջական կապ հետվիրահատական շրջանում ճնշման բարձրացման հետ՝ հավանական չէ:

Հարգելի HAMO, բարև Ձեզ, նախ կարևոր է քարերի չափը, ձևը, լեղապարկում լեղու մածուցիկությունը: Թե ինչպես վարվել, ավելի ճշգրիտ կասի մասնագետը, ով անց է կացրել հետազոտություն և գիտի վերոնշալի պատասխանները: